Kryetari i LSDM-së, Venko Filipçe pas mbarimit të takimit me kryeministrin Hristijan Mickoski, deklaroi se në takim janë dakorduar që të formohen grupe pune.
“Patëm një takim vërtet konstruktiv me kryeministrin. Mendoj se kërkesa e qytetarëve për bashkëpunim në disa fusha për përmirësimin e cilësisë së jetës ka arritur deri tek ai. Ramë dakord të punojmë në mënyrën e realizimit, të formojmë trupa dhe grupe pune për zbatimin e agjendës së reformave. Kjo përfshin ligjet fillestare në fushën e drejtësisë, më tej energjetikën dhe disa çështje lidhur me lëvizjet strategjike në shëndetësi. Ky është një takim fillestar, do të shohim se cila do të jetë metodologjia,” tha Filipçe.
Ai tha se nuk është caktuar një takim i radhës, por se do të delegojë ekspertë nga fusha e energjetikës dhe drejtësisë. Ai theksoi se pret që të gjitha partitë politike të ulen në tryezë për këto tema.
“Diskutuam për integrimet evropiane, kemi pozicione të ndryshme dhe do të flasim më tej për këtë çështje,” shtoi Filipçe.
Sipas tij, hapi i ardhshëm logjik është një takim i nivelit të lartë.
