Drejtori i Drejtorisë për Zbatimin e Sanksioneve, Aleksandar Pandov, ka njoftuar se po vihen në funksion byzylykët elektronikë, pra mundësia që në Maqedoni të ketë të dënuar në arrest shtëpiak nën mbikëqyrje elektronike.
Siç tha ai, në disa burgje ka tejkalim mbi 100% të kapacitetit, dhe qëllimi kryesor i byzylykëve është të zvogëlohet popullsia e të burgosurve. Ekzistojnë dy mënyra për përfitimin e tyre – ose përmes kërkesës nga të dënuarit përmes avokatëve të tyre, ose nga vetë burgjet.
Ligjet aktuale i japin mundësi tre kategorive të të dënuarve të përfitojnë nga ky sistem: personave të moshuar dhe të pafuqishëm, grave shtatzëna ose nënave me fëmijë të vegjël, si dhe personave me sëmundje të rënda ose me aftësi të kufizuara. Burgjet vetë mund të propozojnë që për një kategori të caktuar të dënuarish të vendosen byzylykët, tha Pandov në një konferencë për media, duke shtuar se ai vetë po teston aktualisht një byzylyk.
“Nëse largohesh nga perimetri ose nëse e lëvizni ruterin, byzylyku sinjalizon me të kuqe. Nga Drejtoria e Sanksioneve telefonojnë të dënuarin, sepse çdo ruter ka kartelë SIM. Nëse nuk përgjigjet, ka një person të afërt që mund të kontaktohet. Nëse as ai nuk përgjigjet, lajmërohet policia. Besoj se kushdo që merr byzylyk nuk do të guxojë ta keqpërdorë,” tha Pandov.
Ai shtoi se një i burgosur i kushton shtetit mbi 2000 denarë në ditë.
