Ministri i Punëve të Jashtme dhe Tregtisë së Jashtme, Timço Mucunski, është përzgjedhur si Lider i Ri Global (YGL) në Forumin Ekonomik Botëror (WEF) për vitin 2025. Kjo njohje prestigjioze u jepet individëve të jashtëzakonshëm nën moshën 40 vjeç, të cilët kanë demonstruar aftësi të jashtëzakonshme drejtuese dhe një përkushtim të fortë në përmirësimin e kushteve të botës.
Forumi i Liderëve të Rinj Global është një komunitet i përkushtuar për të formuar liderë të përgjegjshëm që kontribuojnë në mënyrë aktive në përmirësimin e rrethanave globale. Çdo vit, Forumi Ekonomik Botëror, përmes një procesi përzgjedhjeje që përfshin vendimin e një komiteti të specializuar dhe konsultime me ekspertë të shumtë, zgjedh një grup prej rreth 100 drejtuesish nën moshën 40 vjeç nga e gjithë bota (10 prej të cilëve janë nga Evropa) që marrin këtë njohje.
“Jam veçanërisht i nderuar që jam përzgjedhur si një nga Liderët e Rinj Global për vitin 2025 nga Forumi Ekonomik Botëror.
Të qenit i njohur si pjesë e një grupi të suksesshëm liderësh nën 40 vjeç – të cilët vijnë nga politika, ekonomia, akademia dhe shoqëria civile nga e gjithë bota, është një privilegj i jashtëzakonshëm, por edhe një përgjegjësi e madhe. Në kohë sfidash globale dhe transformimesh dinamike, lidershipi duhet të bazohet në vizion, integritet, ndjeshmëri dhe përkushtim ndaj zgjidhjeve afatgjata dhe të qëndrueshme”, thekson Mucunski.
