Tensionet shpërthyen gjatë natës në Beograd, ku grupe studentësh bllokuan selinë e televizionit publik RTS në qendër të kryeqytetit.
Pasi kanë ndërmarrë veprime pak para mesnatës, protestuesit thanë se aksioni do të vazhdojë për 22 orë.
“Të gjithë do të mund të dalin nga ndërtesa, por askush nuk do të mund të hyjë”, thanë organizatorët.
Një njësi policore që mbërriti në vendngjarje për të siguruar daljen e personelit u sulmua dhe një oficer u dërgua në spital me një lëndim në sy. Asnjë incident tjetër i rëndësishëm nuk është raportuar deri më tani.
Presidenti Aleksandar Vuçiq ka shkuar menjëherë në spital për të vizituar policin e plagosur, raporton A2 CNN.
“Të dhunshmit mendojnë se u lejohet gjithçka. Nuk është kështu. Ata do të përgjigjen për çdo akt të dhunshëm që kryejnë”, ka shkruar ai në Instagram.
Në solidaritet me kolegët e tyre në Beograd, studentët në Novi Sad gjithashtu bllokuan hyrjet në selinë e Radio Televizionit Vojvodina (RTV) gjatë natës. Forca të shumta policie kanë mbërritur në vendngjarje.
