Në sulmin e fundit me raketa nga Irani drejt Izraelit, disa nga raketat që anashkaluan sistemet e mbrojtjes ajrore goditën Tel Avivin dhe zonat përreth tij, transmeton Anadolu.
Alarmet e sulmit ranë në një zonë të gjerë në Izrael për shkak të zjarrit intensiv me raketa nga Irani drejt Izraelit në orët e para të mëngjesit.
Disa raketa që anashkaluan sistemet e mbrojtjes ajrore goditën Tel Avivin dhe zonat përreth tij. Ekipi i Anadolus vërejti se një raketë goditi të paktën një pikë në qendër të Tel Avivit, ku pas shpërthimit të fuqishëm u ngrit tym i dendur.
Nga ana tjetër, thuhet se shpërthimet shkaktuan dëme të mëdha në ndërtesa në lagjen Gush Dan të Tel Avivit, qytetin Petah Tikva, dhe ekipet e zjarrfikësve dhe të shpëtimit u dërguan atje.
Imazhe të raketës që bie në një zonë ku ndodhen rafineritë e naftës, termocentralet dhe objektet industriale në qytetin portual verior izraelit të Haifës u shpërndanë në media sociale.
Shërbimi izraelit i ndihmës emergjente, Ylli i Kuq i Davidit, tha se raportet fillestare tregojnë se 25 persona u plagosën, njëri prej të cilëve në gjendje të rëndë.
– Konflikti filloi me sulmet e dhunshme të Izraelit ndaj Iranit
Më 13 qershor, Izraeli nisi sulme në shkallë të gjerë duke synuar objektet bërthamore në qytete të ndryshme në Iran, si dhe komandën e lartë ushtarake.
Ndërkohë që Shefi i Shtabit të Iranit, Komandanti i Përgjithshëm i Gardës Revolucionare, disa komandantë të lartë dhe 9 shkencëtarë bërthamorë vdiqën në sulme, numri total i viktimave civile u njoftua si 224.
Raportohet se 16 persona u vranë dhe më shumë se 400 të tjerë u plagosën në hakmarrjen e ushtrisë iraniane me raketa balistike kundër Izraelit.
